Ég er enginn forsetafrú

 Flóttinn til Jórdaníu gekk vel en ísraelskir landamæraverðir voru ekkert sérlega hrifnir að fá mig aftur. Gáfu mér aðeins tveggja vikna vegabréfsáritun í þetta skiptið. Þannig að ég verð að gjörasvovel og hypja mig aftur þann 23. þessa mánaðar.  

Í vor bárust þær skelfilegu fregnir frá Ísrael að Dorrit okkar Moussaieff hefði verið kyrrsett í tvær klukkustundir á flugvellinum þar í landi. Ólafur Ragnar varð öskuvondur, lét öllum illum látum og skellti meira að segja hurðum eftir fund með Ísraelskum embættismanni. Svívirðileg framkoma, sagði hann og fleiri.  

Ég endurtek: Tvær klukkustundir.

Tveimur mánuðum síðar var Íslendingi haldið í yfirherslum á flugvellinum í þrettán klukkustundir. Mánuði síðar hugðist annar Íslendingur heimsækja skyldmenni sín í Palestínu en var vísað aftur heim, sem er ekkert einsdæmi.  

Ég endurtek: Tvær klukkustundir. Það er álíka langur tími og Palestínumenn þurfa að bíða á vegatálmunum umhverfis Nablus til þess að komast útúr borginni! Alltaf!  

Þegar ég kom fyrst til Ísrael var ég kyrrsettur á landamærunum í þrjár klukkustundir og aðeins örlítið skemmri tíma þegar ég kom aftur á dögunum. Á landamærunum þurfti ég að svara margendurteknum spurningum um allt og ekkert. Flestar þeirra skiptu engu máli og sumar voru einfaldlega niðrandi. En það er einmitt tilgangurinn – að niðurlægja menn sem grunaðir eru um að vera á leið til Palestínumanna.  

Nú hef ég ekki fylgst náið með fréttum heima en ég stórefa að forsetinn minn hafi látið Ísraelsmenn heyra það fyrir að halda mér nauðugum. Það var allavega ekki gert í sumar þegar ofangreinir Íslendingar lentu í veseni á flugvellinum. Það er greinilega djúp gjá milli pöpulsins og forsetafrúarinnar.

Athugasemdir

[Guðný Rut (IP-tala skráð) 14.10.2006 kl. 21:39]

Já það er sko ekki sama hvort það er Jón eða séra Jón..
Svo finnst mér nú líka nokkuð greinilegt að þú sért engin forsetafrú... skulum vona að mér skjátlist ekki ;)

kv,
Guðný Rut

[Elín (IP-tala skráð) 14.10.2006 kl. 22:47]

...ég held að það sé rétt hjá þér. Tilgangurinn er að niðurlægja fólkið.

[Máni (IP-tala skráð) 15.10.2006 kl. 12:56]

Sorrí þú að vera ekki giftur forseta. Vonandi verður kosin kona sem forseti næst svo þú getir reynt við hana :D

[Jón (IP-tala skráð) 15.10.2006 kl. 18:23]

Ósvífni!
EN frúin okkar íslenska er ábyggilega oft á fer á Selfossi út af fjölskldutengslum. Er ekki bara að bera sig upp við hana? Kannski þú getir meira að segja fengið sérstaka áritun??