Lygamelurinn frá News of the world

Breska götublaðið News of the world er mest selda fréttablað í heiminum. Það er líka einn illskeyttasti og uppblásni snepill sem fyrirfinnst og gengur ævinlegra lengra en systurblöð sín, The Sun og The Mirror, en öll þessi blöð tilheyra fjölmiðlabaróninum Robert Murdok.

 

David McGee heitir blaðamaður News of the world. Hann er frægur fyrir að villa á sér heimildir og grafa með því upp sandala eins og þennan. Nokkuð aðdáunarvert.

 

Nú er David þessi staddur í Palestínu og Ísrael, á hnöttunum eftir uppslætti um hin umdeildu ISM-hjálparsamtök og sjálfboðaliðina sem tilheyra þeim, þó aðallega þá bresku.

 

Með klókindum tókst honum að hafa upp á ISM-ólívuhópnum í Nablus og sótti hart að því að fá að gista á heimili þeirra í gamla bænum. Bretarnir í hópnum umturnuðust þegar þeir fréttu að hingað væri kominn endaþarmur bresku blaðamannastéttarinnar. Það kæmi sko ekki til greina að hleypa honum inn, við skildum hitta hann á kaffihúsi og segja sem allra minnst.

 

Þrír Bretar og einn Íslendingur fóru loks á kaffihús bæjarins til þess að fæða hrægamminn. Miðað við orðsporið sem fór af honum átti hópurinn eiginlega von á sjarmerandi töffara. Í staðinn reyndist þetta vera aumkunarverður náungi á fertugsaldri sem bar það einhvern veginn utan á sér að vera óheiðarlegur. Allt sem hann sagði var tóm tjara ...

 

Hann sagðist vera í sumarleyfi í Ísrael og hugðist skoða alla helstu ferðamannastaði landsins. Fyrst vildi hann hinsvegar sjá Nablus og kynna sér starfsemi vestrænna túrista þar.

 

,,Þessir gyðingar, hvers vegna eiga þeir það til að ráðast á Palestínumenn," spurði hann til að mynda eins og afbarnslegri forvitni, augljóslega að fiska eftir því að hópurinn léti gamminn geysa um það hvað gyðingar væru vondir og ættu allt illt skilið. ,,Ég skil, þeir eru svona eins og helvítis sígaunarnir sem þvælast um í vegkantinum, er það ekki," skaut hann meðal annars lævísilega inn í samtalið í von um að geta lagt okkur orð í munn. Við bitum hinsvegar ekki á agnið og fljótlega gafst hann upp, fór á hálfgerðann bömmer yfir þessari fýluferð til Nablus.

 

Fyrirfram ákveðin saga um þetta umtalaða ISM-hyski gekk ekki upp. Við hefðum átt að vera einhvern veginn svona: Breskir róttæklingar í Palestínu uppfullir af hatri í garð júða og í þokkabót dópistar og drykkjuræflar!

 

Síðuskrifari hefur hingað til verið lesandi News of the world en var svakalega svekktur yfir viðvaningslegum vinnubrögðum stjörnublaðamannsins. Hefði hann gerst sjálfboðaliði fyrir samtökin undir fölsku flaggi - sem hann hefur sennilega ekki haft tíma fyrir - myndi hann umsvifalaust koma upp um sig. Klaufagangurinn og óöryggið var slíkt.

 

Nú er spurning hvað hann skrifar. Ekki getur hann sagt ritstjóranum sínum að ferðin til Ísrael hafi verið til einskins.

 

 

Athugasemdir

[ragnarr (IP-tala skráð) 28.11.2006 kl. 22:42]

Ætli fyrirsagnirnar hans minni svolítið á fyrirsagnirnar okkar sem við búum til í frístundum okkar ?

[Rebekka Kristinsdóttir (IP-tala skráð) 28.11.2006 kl. 23:37]

sem eru.....???;)

[Yousef (IP-tala skráð) 29.11.2006 kl. 08:14]

hahahahahaah :D ... aðraeins vitleysu einsog www.stoptheism.com hef ég ekki séð lengi.. dálítið langsótt sumir hlutir á þessari síðu.

Gangi þér félagi ;)

[Arnþór (IP-tala skráð) 29.11.2006 kl. 19:59]

manst eftir því að taka með þér grjót handa mér? væri til í 2 grjót í þægilegri kaststærð.

[Egill Bjarnason, 29.11.2006 kl. 21:29]

Fyrirsögnin verður sennilega:

ISM-hyskið: Sláandi leiðinlegt! 

eg skal gefa þér grjót frá palestinu, arnþór. landið á meira enn nóg af því, þess vegna er alltaf verið kasta því.

 stoptheism.com er sannarlega brandari. ótrúlegt að nokkur skuli leggja alla þessa vinnu á sig til þess að rakka niður samtök eins og ism. það er víst einhver sturlaður kani sem stendur á bak við síðuna.

[Andrés Magnússon, 10.12.2006 kl. 21:02]

Athugasemdirnar um News of the World eru nú ekki alls kostar réttar. Það er langur vegur frá því að það sé útbreiddasta dagblað heims, efst á þann lista raða japönsku blöðin sér og hið þýska Bild er eina evrópska blaðið þar. Þar fyrir utan kemur NotW aðeins út á sunnudögum og margir líta á það sem sunnudagsútgáfu The Sun, en bæði blöðin eru í eigu News Corporation, þar sem Rubert Murdoch hefur töglin og hagldirnar. En Mirror kemur þeim ekkert við, það er einmitt helsti keppinautur Sun og er í eigu Trinity Mirror, sem er stærsta blaðakeðja Bretlands með um 250 héraðsfréttablöð í bland við stærri blöð eins og People, Sunday Mail og fleiri.

[Egill Bjarnason, 12.12.2006 kl. 19:42]

Æ. Blaðamaðurinn góðkunni David McGee mataði mig þeim upplýsingum að News of the World væri útbreyddasta dagblað í heimi. ,,Eða það er allavega það sem ,,þeir" segja okkur," man ég að hann sagði.  Mér tókst síðan sjálfum að blanda the Mirror inn í málið vegna misskilnings. Þakka leiðréttingarnar, Andrés!