Hafmeyjur í Afríku

Þegar ég póstaði blogginu hér að neðan, var mér hugsað til frásagnar Kenýamanns af hafmeyju.

Það var 2004 að ég, pabbi og Eva systir fórum á bát að snorka við strendur Kenýa.

Við sáum krabba, steina og smáfiska; ómerkilegt smotterí fyrir bátsmanninum okkar. Hann hafði nefnilega séð hafmeyju en nefndi það nú samt í hálfgerðu framhjáhlaupi.

Hafmeyju! Athygli pabba var náð.

Maðurinn útlistaði í löngu máli útliti þessa „hálfa fisks og hálfa manns" og sagði að sá sem krækti í slíka skepnu yrði að virða ákveðnar hefðir. Kynlíf með hafmeyju væri til dæmis illa séð.

Eftir að hafa malað hikstalaust í klukkutíma, spurði bátsmaðurinn hvort við vildum sjá mynd þessu til sönnunar. 

Síðan leiddi hann okkur inní hús við höfnina, benti á plakat með myndum úr dýraríkinu og sagði stoltur: Þetta er hún!

Á myndinni var selur.

Upptaka Hafmeyjufræðingurinn með áhugasömum áheyranda.  

Athugasemdir

[Júlíus Björnsson, 29.6.2009 kl. 23:14]

Það mun hafa verið almenn trú líka á norðurslóðum áður fyrr að selir væru niðjar þeirra sem fórust í Rauðahafinu á dögum Móses.

[Eva (IP-tala skráð) 30.6.2009 kl. 13:30]

hahaha, þetta var svo brjálæðislega fyndið. (En btw, þá áttum við pabbi mjög alvarlegar samræður um þetta núna í vikunni og hann heldur því ennþá fram að þetta hafi verið hafmeyja)

[Bjarni Harðarson, 6.7.2009 kl. 22:37]

iiiii - sko, þetta var alls ekki selur heldur sjávarspendýr náskyld sirenunum grísku og alþekkt kvikendi að hafa verið talin hálfmennsk - aftur á móti eru sírenur þessar að útliti líkari selum en konum en það er aukaatriði í þessu máli. aðalatriði er að hafmeyjufræðingurinn í mombasa hafði séð hafmeyjar og leitt hugann að nánari kynnum við þær...